Ако сте во потрага по книга која истовремено ќе ве насмее до солзи, но и ќе ве растажи до солзи и ќе ви го стопли срцето, мојата следна препорака во делот за литература е дефинитивно светскиот бестселер на Фредерик Бакман.

Кој е, всушност, Уве?

Уве е пензионер во Шведска кој будно „води ред“ во заедницата во која живее. Кај него сè мора да биде подредено и по строги правила: рампата секогаш мора да се затвора кога влегувате со автомобилот, велосипедите не смеат да бидат оставени на тревникот – едноставно, редот мора да се почитува!

Неговата заедница се состои од неколку куќи. Не е преголема, но најголем немир на Уве му создаваат промените. Тој ги претпочита постојаните, стари навики… онака како што нештата биле некогаш.

Зад строгата маска се крие голема тага

Неговата сакана сопруга Соња починала од рак, а Уве едноставно ниту сака, ниту може да се привикне на фактот дека треба да живее сам. Не наоѓајќи смисла во секојдневието, тој упорно бара начин да си го одземе животот во својот дом. Но, дури и во тој чин, Уве е до крајност педантен: сака сè да биде средено и да не направи неред, па буквално постила најлони врз тепихот пред да се обиде да се самоубие.

Но, токму кога ќе се обиде… животот одлучува постојано да го прекинува.

Парване: Сосетката која ќе му го смени светот

Во моментите на неговиот најголем мрак, на вратата му заѕвонува Парване – бремена жена со потекло од Иран, неговата нова сосетка. Од тоа прво чукање на вратата, па сè до крајот, таа упорно му ги прекинува плановите и му наметнува секојдневни обврски:

• Го тера да ѝ помогне на нејзиниот сопруг со паркирањето;
• Му ги доверува децата на чување;
• Му „наметнува“ една улична мачка за која тој едноставно мора да почне да се грижи.

И додека Уве цврсто се држи до својата решеност да му стави крај на сè, тој несвесно, чекор по чекор, се навикнува на новите луѓе околу него. Паралелно со овие настани, пред читателот како на филмска лента се одвива неговиот минат живот, моментот кога ја запознал својата сакана Соња и сите преубави години поминати со неа.

„Луѓето велеа дека Уве го гледа светот во црно и бело. А таа беше бојата. Единствената боја што ја имаше во неговиот живот.“

За да не ви ја раскажам целосно оваа прекрасна книга, ќе застанам тука. Доколку сè уште не сте ја прочитале, моја срдечна препорака е веднаш да ја ставите на вашата листа за читање.